Колку ќе расте БДП - Ставрески контра Груевски
Вицепремиерот очекува дека во 2009 година ќе имаме раст од 4 до 5 отсто
Александрија Стевковска
Владата нема да ја ревидира проектираната стапка на раст од 5,5 отсто за идната година, иако и самата признава дека ваков раст не може да се постигне. Стапката на раст со која се калкулира, според вицепремиерот Зоран Ставрески, засега се движи во границите од 4 до 5 отсто, што практично значи прифаќање на проекциите кои веќе ги објавија меѓународните институции, а го отсликуваат влијанието на светската економска криза врз економиите во светот, вклучително и македонската. За разлика од него, премиерот Никола Груевски се' уште цврсто се држи на ставот дека идната година земјава ќе оствари раст од 5,5 отсто.
„Доколку прашавте во септември колку ќе биде проекцијата на Владата за растот на БДП за наредната година, ќе кажевме околу седум проценти. Поради кризата, како проекција веќе го намаливме на 5,5 проценти. Засега остануваме на тоа, а во зависност од движењето на работите, ќе видиме дали ќе треба да се направи евентуална корекција на оваа проекција“, изјави вчера премиерот Груевски.
Наспроти него, вицепремиерот Ставрески вчера излезе со спротивна изјава, признавајќи дека Владата ја намалила предвидената стапка на раст.
„Економскиот раст ќе биде толкав колку што ќе произведе приватниот заедно со јавниот сектор, односно со капиталните инвестиции. Се надеваме дека Македонија ќе успее да одржи колку што е можно повисока стапка на раст во овие околности. Во досегашните анализи, ставовите и на Европската комисија и на Светска банка се дека стапката на економски раст ќе биде меѓу 4 и 5 проценти и засега сметам дека може да се оди со предвидување за таква стапка. Ако во текот на годината се покаже дека околностите се измениле, ќе се разгледуваат и другите параметри и ќе дојдеме до правилни констатации. Засега ��е согласуваме со процените на СБ и на ЕК“, изјави вчера вицепремиерот Зоран Ставрески.
Според него, засега проекциите во Буџетот за идната година остануваат исти. „Засега Буџетот за идната година останува така како што е проектиран. Ќе видиме какво ќе биде остварувањето во првите неколку месеци, а потоа во зависност од тоа колку ќе трае светската економска криза и колку ќе бидат реалните импликации врз македонската економија, подготвени сме за приспособување во која било насока“, најави Ставрески.
Досега во неколку наврати низа странски финансиски институции во своите извештаи за земјава прогнозираа стапка на раст пониска од владината, која беше оформена во септември и која не ги зема предвид последиците од светската економска криза. За разлика од нашата Влада, која цврсто се држеше за првичната проекција вградена во Буџетот за економски раст од 5,5 отсто, експертите на Меѓународниот монетарен фонд и СБ предвидоа земјава идната година да оствари стопански раст меѓу 4,5 и 5 проценти. Виенскиот институт, пак, одеше со многу пониска прогноза, односно со стапка од само 3 отсто раст на БДП за 2009 година. Слична перцепција имаше и за економиите на земјите во регионот поради финансиската криза што вовлече во рецесија повеќе европски земји. Експертите прогнозираа и забавен економски раст во земјите од Југоисточна Европа, со предупредување дека економиите во транзиција ќе се соочат со продлабочување на трговскиот дефицит, намалување на производството и забавено кредитирање. |
