Арсов до професорите: Мрзливите да си одат

Никој не е казнет досега затоа што не употребувал компјутер

Жаклина Ѓорѓевиќ


„Да си одат мрзливите наставници и директори“, им порача директорот на Државниот просветен инспекторат, Џорџе Арсов, на професорите, кои, според него, одбиваат да користат компјутери во наставата. „Компјутери има, Интернет исто така, а има и софтвер“, тврди Арсов, кој вели дека наставниците лажат кога кажуваат дека проектот „Компјутер за секое дете“ не функционира.

Од вчера почнаа контролите во средните и во основните училишта дали компјутерите се користат во наставата. Досега ниту еден директор или професор на училиште не е казнет затоа што не употребувал компјутер. А, казните се навистина „сочни“, и тоа 3.000 евра за директор и 1.000 евра за наставник што нема да користи компјутер додека предава.

Инспекциски тимови од двете министерства, за образование и за информатичко општество, во претходниот период прошетаа по средните училишта скенирајќи дали во нив се инсталирани компјутери. Во наредниот период, пак, ќе се проверува дали компјутерите се користат во наставата, бидејќи според новата законска регулатива, 30 отсто од наставата мора да биде преку компјутери. Директорот на просветниот инспекторат, Арсов, најави дека целта им е целосно да ги оспособат компјутерите најдоцна до идната учебна година, а можеби и порано.

„Ако не ги користат компјутерите, ќе ги казниме наставниците и директорите, еднаш, двапати, но на крајот ќе мора да си одат“, ни изјави Арсов. Тој вели дека досега не се правени контроли за употреба на компјутерите, иако тие се користат веќе трета учебна година.

„Не може да се казнува за нешто што не постои“, вели директорот на едно скопско средно училиште, мислејќи притоа на софтверот што треба да се користи за компјутерите. Тој тврди дека досега никој не им предал софтвер за компјутерите. „Нашата борба не е да ги користиме компјутерите, туку да ги заштитиме од оштетувања“, додава тој. Според директорот, досега наставниците поминале само една обука и тоа за „едубунту“, која траела неколку дена. Дополнително, проблем им е тоа што компјутерите не се осигурени, така што одговорноста паѓа на грбот на училиштето.

Директор на друго училиште вели дека не може да се вклучат сите компјутери наеднаш, бидејќи ќе им изгори инсталацијата, па ги користат повремено во текот на наставата.

Опозицијата тврди дека наставниците никогаш не биле попонижени отколку што се сега, бидејќи само за 40 минути наставник може да биде казнет со 12.000 евра по три основи, кои тешко се докажуваат - 1.000 евра ако не ја користи информатичката опрема, 1.000 ако не применува интерактивна настава и од 5.000 до 10.000 евра ако не им укаже на учениците да не чкртаат во учебниците.