Трговскиот дефицит расте, размената паѓа

Трговскиот дефицити и натаму расте, а размената со странство паѓа. За седум месеци, трговскиот дефицит достигна 1,31 милијарди долари, а споредено со јуни, дефицитот пораснал за 123 милиони долари.

Според последните податоци на Државниот завод за статистика за периодот јануари-јули, обемот на стоковната размена на земјава со странство е за 37,4 отсто помал во споредба со истиот период од минатата година.

Вкупната вредност на извозот на стоки од Македонија изнесува 1,454 милијарди американски долари, а на увозот 2,769 милијарди американски долари. Покриеноста на увозот со извоз изнесува 52,5 отсто.

Трговската размена по производи покажува дека во извозот најголемо е учеството на производите од железо и челик, односно таканаречени валани производи, облеката, фероникелот и преработките од нафта.

Во увозот најмногу е застапена суровата нафта, електричната енергија и моторните возила за превоз на лица. Во извозот на стоки најголемо е учеството на земјите-членки на ЕУ со 56,5 проценти и земјите од Западен Балкан со 36,8 проценти.

Во увозот, исто така, најголемо учество имаат земјите од ЕУ со 52,3 отсто и земјите во развој со 26,5 проценти. (С.М.)