На светот му се закануваат нови финансиски кризи, кои ќе бидат различни од актуелната глобална, изјави поранешниот прв човек на американската управа за федерални резерви (ФЕД), Алан Гринспен, во интервјуто за британската телевизија Би-Би-Си 2.

„Финансиските кризи се разликуваат една од друга, но сите имаат еден заеднички извор, а тоа е нескротливата желба на луѓето за продолжување на долгите периоди на просперитет на што е можно подолг рок“, изјави Гринспен.

Тој во интервјуто наведува дека ја предвидел актуелната глобална криза, која, според него, е последица на подолгиот период на економски просперитет во развиените земји. Актуелната криза е предизвикана од зголеменото тргување со хипотекарни кредити во САД, при што заемите за купување недвижен имот им се одобрувани на лица со лоша кредитна историја, смета Гринспен. (МИА)