Претходен број

Македонски состојби

Храмот на Велјановски - срам на демократијата!

Манчо Митевски

Од измешаноста на власта, партијата и црквата, веќе не се знае кој е поглавар: г.г. Стефан или г. Никола!

„Грешка беше носењето толку голем број закони по итна постапка... нема да се повтори таков начин на носење закони, со таков обем“, призна парламентарниот спикер Трајко Велјановски. Дека тоа навистина е грешка на спикерот му беше укажувано од независните медиуми и експерти и од опозицијата, во деновите кога беше обземен од еуфоријата да ги донесе сите закони што во коцкестите згради на Владата ги произведуваше со максимална продуктивност неговиот партиски шеф Груевски. За две недели беа донесени околу 140 закони и дополнувања, во постапка од 35-40 секунди по закон, а некои се усвојуваа и на полноќ, во делник или празник, во истиот момент кога пристигнуваа од Владата. Но, тој тогаш ги одбиваше укажувањата со образложение дека парламентарното мнозинство го прави сето тоа во согласност со Уставот и законите.

Требаше да помине извесно време, да се спушти еуфоријата од „ветуваме - остваруваме“, спикерот да биде повикан од амбасадорите на земјите-членки на ЕУ и да му се објасни дека ваквиот начин на донесување закони, особено без присуство и дијалог со опозицијата и без консултации на експертите и заинтересираните асоцијации, ја уназадил земјата во нејзините ЕУ- аспирации. Притоа, пред камерите и новинарите од амбасадорот Валеро јасно му беше потенцирана двојната одговорност „од една страна, на Собранието, како мотор на развојот на земјата, а, од друга страна, посебната одговорност што ја сноси претседателот на Собранието како аниматор и одговорен за сета работа што ја врши таа институција“. Дури тогаш Велјановски сфатил дека згрешил и ветил дека ќе се поправи. Но, каква поука извлекоа од сево ова неговиот партиски шеф, кој ја определуваше потребата од итна постапка на донесување на законите, и пратениците на владиното мнозинство, кои како послушни партиски војници во тој процес ги употребуваа само прстите, а не главата. И, спикерот јавно призна дека тоа е грешка и толку. Банално е да укажуваме дека во демократските земји и за помали грешки од оваа се поднесуваат оставки.

По вакво нешто, не треба да зачудува состојбата дека граѓаните немаат доверба во институциите, посебно во парламентот. Но, во засега несудениот храм на де��ократијата има и други бисери. Еден од минусите на Македонија за ЕУ беше тепачката во Собранието. Поради мир во коалицијата (ДПА), минатиот состав не го усвои извештајот и заклучоците. Сега, од Кабинетот на спикерот дојде абер дека спомнатиот извештај оди ад акта поради процедурални причини - тоа е извештај на стариот состав. Злобниците веднаш прокоментираа, пак поради мир в куќа (во која сега е ДУИ). А мешањето на составите не беше проблем за спикерот кога новоизбраниот состав ги изгласа стотината закони по итна постапка подготвени од старата влада на Груевски во оставка, згора и техничка. Тогаш спикерот дозволи еден ист човек (Имер Селмани) да се појавува во две својства: како министер во старата влада да ги предлага и брани законите, а како новоизбран пратеник да гласа за нив! (Сега Селмани формираше своја партија за да покажел што е демократија!) Или, пратениците на ДУИ. Тие во минатиот состав го блокираа Собранието со 3.500 амандмани на предложениот деловник, па Груевски инсистираше на вонредни избори за да се одглави парламентот, во новиот состав, но во улога на владин коалициски партнер, без забелешки, гласаа за порано неприфатливите решенија! И за крај, иако има и многу други бисери, треба да се каже дека со неколку закони и дополнувања во парламентот околу веронауката, по итна постапка, се направи хаос и во образованието и државата, се измешаа партијата, власта и црквата, па тешко е да се одгатне дали Македонија е секуларна, но и кој е поглавар: г.г. Стефан или г. Никола!

Се' на се', потребен е ментален ремонт на „храмот на демократијата“.