Концерт на Симфонискиот оркестар на ФМУ

В понеделник (6 декември) во Домот на АРМ во 20 часот ќе се одржи свечен концерт на Симфонискиот оркестар на Факултетот за музичка уметност, со кој традиционално се одбележува денот на основањето на оваа институција. Под диригентската палка на Саша Николовски-Ѓумар, како солист ќе настапи Софија Никоска на виолина, а ќе бидат изведени дела од Манчев, Брамс и Сибелиус.

Младата виолинистка Софија Никоска (1991) е една од најталентираните музички уметници од помладата генерација музичари. Во текот на нејзината музичка кариера има остварено многу концерти во Македонија и надвор од неа, во рамките на фестивалите „Охридско лето“, „Скопско лето“, настапи со Македонската филхармонија во рамките на концертите од ФМУ и ДМБУЦ, редовно учествува во камерниот оркестар на МММ. Добитник е на голем број награди и признанија. (Т.И.)