„Аутмајнд“ во живо на Канал 103

Во најновото продолжение на радио серијалот „Ако никој не свири“, в недела во 22 часот, со свој настап од глувата соба на Канал 103 ќе се претстави скопскиот музички состав „Аутмајнд“.

„Аутмајнд“ се формира во 2006 година и во групата членуваат: Златко Цеков, Игор Атанасоски-Харе и Жарко Пејковски - искусни музичари со разновиден музички бекграунд кој влијае во формирањето на звукот на бендот, а кој тие самите го дефинираат како „модерен вокално-електронски израз кој се темели на моќни битови и на фанки гитари“.

На својот прв настап во „Канал 103“, „Аутмајнд“ ќе се претстави во акустично издание и во проширена постава. Освен материјалот кој се најде на нивниот истоимен деби албум од минатата година, групата ќе свири и досега необјавени песни.

За звукот ќе биде задолжен Ален-Хаџи Стефанов. Радио концертот ќе може да се слуша и преку Интернет на www.kanal103.com.mk.