Цела Европа на заеднички штрајк

Синдикалците од повеќе земји закажаа голем европски штрајк што ќе се одржи на 29 ноември

Голем сеевропски штрајк, кој доби поддршка од повеќе синдикати од Европа, е најавен е за 29 ноември оваа година. На него се очекува синдикалците да ја покажат својата солидарност.

Според најавите, на штрајкот ќе учествуваат синдикати од многу земји од стариот континент.

Овој штрајк ќе претставува кулминација на бранот штрајкови што ги потресоа летово Грција, Франц��ја, Романија, Велика Британија, Шпанија, Португалија, Италија, Чешка и Германија.

Повод за масовните штрајкови се ригорозните мерки на штедење што ги презедоа дел од европските влади, кои предвидуваат намалување на платите и на пензиите, отпуштања во јавниот сектор и поместување на старосната граница за пензија.

Овие мерки потврдуваат дека многу држави, и покрај почетните знаци на закрепнување, се' уште не се излезени од економската криза, што особено важи за државите што потонаа во рецесија. Голем број влади поради тоа воведуваат ригорозни мерки на штедење, што предизвикува големо незадоволство.

Состојбата и натаму е најтешка во Грција, каде што работниците речиси секојдневно протестираат на улиците на Атина или Солун.

Аналитичарите предупредуваат дека најголема опасност во претстојните протести доаѓа од младите, кои беа најтешко погодени од европската криза.

Кон крајот на овој и во почетокот на следниот месец се најавуваат протести во Велика Бриотанија, Грција, Франција, Литванија, Романија, Словенија и во други земји. (Ек.Р.)