Мадона посекси од кога било
Светската турнеја „Sticky и Sweet“ ќе опфати 51 концерт во Европа, САД, Канада, Мексико и Бразил
Со концертот на стадионот „Милениум“ во Кардиф, Велс, на кој присуствуваа 40.000 обожаватели, поп-кралицата Мадона ја започна турнејата „Sticky и Sweet“, во чии рамки на 25 септември ќе настапи и во Будва. Двочасовниот концерт го одбележаа нејзините големи хитови, но во нови верзии и со контроверзни видеоснимки на Адолф Хитлер, Роберт Мугабе и американскиот кандидат Џон Мекејн, кој вчера остро реагираше на употребата на неговото име за време на настапот на Мадона.
Мадона на своите обожаватели им покажа дека е во врвна форма и дека педесетката што ја заокружи пред десетина дена - не и' може ништо. Напротив, таа никогаш не изгледала посекси и поенергично, се пресоблече дури осум пати во костими на „Живанши“, а за време на двочасовниот спектакуларен концерт изведе 22 песни, од кои особено се издвојуваа техноверзиите на „Like a Prayer“ и „Ray of Light“. Меѓу песните беа покажувани видеопораки од Кени Вест, Бритни Спирс и Фарел Вилијамс, а на концертот во Велс присуствуваа и нејзиниот сопруг Гај Ричи и трите деца Лурдес, Роко и Дејвид.
Светската турнеја „Sticky и Sweet“ на Мадона ќе опфати 51 концерт во Европа, САД, Канада, Мексико и Бразил, а својата завршница ќе ја има на 18 декември во Сао Паоло.
|
