Шола по мерка на публиката
На завчерашната интернационална вечер на „Охрид фест“ победи гостинката од Хрватска, Антонија Шола, изведувајќи ја песната „Ангеле“ посветена на Тоше Проески
Валентина Тодоровска
ОХРИД - „Ангеле“, песна од последниот албум на Антонија Шола, со најмногу гласови од публиката (130), победи на завчерашната интернационална вечер на 15. издание на „Охрид фест - Охридски трубадури“.
Второпласиран е Ристо Самарџиев, кој ја изведе композицијата „За навека“, додека Влатко Илиевски со „Небо“ ја освои третата награда.
Жирито го резервира третото место за Дејана Николовска, која со песната „Лудило“ предизвика вистинска еуфорија кај публиката во Долни Сарај.
Композицијата „Ангеле“ на Антонија Шола беше и по вкусот на жирито, па така оваа шармантна пејачка зеде уште една награда пласирајќи се на втората позиција, додека првото место му припадна на Шпати Јакупи.
Гостинката од Словенија, Ребека Дремељ, освои награда за сценски настап, Лука Ѓурѓевиќ е најдобриот дебитант на интернационалната вечер, наградата за интерпретација ја зеде гостинката од Србија, Маја Николиќ, за најдобро аранжманско решение наградата му припадна на Хусо-Бит Стрит од истоимената група, а неколкуте специјални награди ги добија преостанатите настапувачи од странство.
На интернационалната вечер не дојдоа Ана Николиќ и Корнелие Ковач и можеби малиот број атрактивни гости не ја направија атмосферата на која сме навикнале на досегашните фестивали.
Сеедно, четири дена во Охрид се празнуваше песната и на сцената и надвор од неа, а многубројните потенцијални хитови ќе бидат запишани во биографијата на „Охрид фест - Охридски трубадури“.
|
