ЕХФ: ЕП во Македонија „возбудливо и единствено“
Европската ракометна федерација го нарече „возбудливо и единствено“ Европското првенство за ракометарки што се одржа во Македонија од 2 до 14 декември. Во писмото до Ракометната федерација на Македонија, очигледно погрешно датирано на 17 ноември, ЕХФ изразува благодарност за сите што беа вклучени во организацијата за надминувањето на „тешкиот период на подготовки и многуте пречки“.
„Позитивните повратни реакции од учесниците покажуваат дека не само врвното спортско ниво на овој настан, туку и вашето гостопримство е препознаено и високо ценето и од меѓународната спортска јавност во целина и посебно од европското ракометно семејство“, стои во дописот од ЕХФ до РФМ, во кој уште се додава дека во јануари 2009 ќе бидат расчистени сите прашања поврзани со финансиите, а произлезени од договорот меѓу ЕХФ и РФМ за организација на ЕП 2008.
Од ЕХФ и веста за ненадејната смрт на 33-годишната Шан Роуленд. Таа беше надлежна за комуникации во Федерацијата и ја надгледуваше работата на прес-центарот во Скопје за време на ЕП. |
