Судењето за претепаниот снимател одложено по петти пат
ТЕТОВО - По петти пат вчера беше одложено судењето на тројца обвинети полицајци што го претепаа снимателот на ТВ Алсат Игор Љубовчевски. Овој пат не беше дојден бранител на второобвинетиот. Судијката Верка Костовска го одложи претресот за десет дена.
Овој случај на јавноста и' е познат кога на 26 септември минатата година кај наплатната рампа Желино тројца полицајци физички го нападнале и малтретирале снимателот на ТВ Алсат Игор Љубовчевски, кому насилно сакале да му го одземат снимениот материјал. Со тупаници го удирале по телото, предизвикувајќи му фрактура на ребрата и нагмеченици по телото и главата. Обвинети се Бесим Несими (46) од Тетово и Рамадан Имери (30) и Весел Дељали (26) од тетовско Боговиње. Тројцата полицајци на местото на настанот го сопреле и сакале да го приведат Садула Дураку, функционер на ДУИ, под сомнение дека во возилото со кое патувал за Тетово имал оружје. (Г.Е.)
