Темни облаци над девизниот курс на Македонија
Дефицитот во тековната сметка и експанзивната фискална политика вршат голем притисок врз девизниот курс
Агенцијата за рејтинг „Стандард и Пур“ го направи првиот чекор кон можно деградирање на девизниот рејтинг на Македонија, истакнувајќи дека влошената ликвидност ќе влијае на оваа источноевропска земја додека надворешното финансирање се исцрпува, а извозот ослабува. Агенцијата за рејтинг истакна дека зголемените цени за увезена енергија, брзорастечкиот увоз на капитални стоки и паѓањето на цените на металите и надворешната побарувачка за извозни метали ќе доведат до „брзо влошување на македонскиот дефицит на тековна сметка, од 7,1 отсто во 2007 година до околу 15 отсто од бруто-домашниот производ во 2008 година“.
Таа неурамнотеженост и намалената достапност на надворешно финансирање би можеле да доведат до послаб развој и притисок врз девизниот курс на Македонија, кој е врзан за еврото. „Стандард и Пур“ забележува дека сценариото е слично на неодамнешните искуства во другите земји од Централна и Источна Европа.
Надежта на Македонија дека ќе започне разговори за членство во Европската унија претрпе неуспех по нерегуларностите и насилството што ги засенија изборите во јуни. Европската унија даде негативна процена во својот извештај за напредокот во ноември, нагласувајќи дека Македонија не ги исполнува политичките критериуми.
„Индикаторите за влошување на надворешната ликвидност и опаднатите нивоа на меѓународни резерви, потенцијално водени од прекумерно експанзивна фискална политика би можеле конечно да доведат до намалување на рејтингот“, вели кредитниот аналитичар на „Стандард и Пур“, Каи Стукенброк.
Претходно, Македонија најави серија мерки во вредност од 330 милиони евра во обид да се справи со глобалната економска криза, вклучувајќи чекори за олеснување на товарот на кризата врз локалните компании, како и намалувањата на даноците и царинските давачки за увоз на сурови материјали. „Стандард и Пур“ ги потврди долгорочниот и краткорочниот девизен рејтинг како ББ+ и Б, а локалниот девизен рејтинг како БББ- и А-3.
Во почетокот на месецот ривалската агенција за рејтинг „Фич рејтингс“ ги опиша изгледите за Македонија од позитивни во стабилни. (Дауџонс бизнис њуз) |
