Мирчеа Џоана ги оспорува претседателските избори во Романија

Трајан Басеску освои мала предност од помалку од 1 отсто во однос на ривалот

БУКУРЕШТ - Актуелниот претседател на Романија, Трајан Басеску, победи со тесен број гласови на претседателскиот решавачки круг од изборите, додека неговиот левоориентиран ривал вети дека ќе ги оспори резултатите, укажувајќи на прекршоци. Официјалните резултати од изборите покажаа дека Басеску има мала предност од помалку од 1 отсто во однос на неговиот ривал, социјалдемократскиот лидер Мирчеа Џоана, со освоени 50,43 отсто наспроти 49,57 отсто гласови.

Џоана, поранешен министер за надворешни работи и амбасадор во САД, тврдеше дека победил уште по завршувањето на гласањето во неделата и не признава пораз. Тој вели дека изборите биле лажирани, нагласувајќи дека неговата партија има докази за „масовна измама“, како што се повеќекратно гласање и купување гласови. „Потребното демократско решение е да се оспори исходот од изборите пред уставниот суд“, изјави тој за новинарите, додавајќи дека ќе поднесе жалба.

Изборните посматрачи од Организацијата за безбедност и соработка во Европа изјавија дека гласањето во неделата, генерално, ги исполнило дадените заложби, но побараа од властите да ги испитаат информациите за нерегуларности, за што се пријавени 194 случаи. Напнатото гласање го продлабочи политичкиот спор во оваа балканска земја, парализирана од сериозна економска криза. Минатиот месец, ММФ ја суспендираше исплатата на дел од спогодбата за финансиски спас на Романија, откако опозициските партии го соборија кабинетот сојузник ��а Басеску.

Романците се надеваа дека изборите во неделата ќе ја извлечат нивната земја од најголемата политичка и економска криза за 20 години. Сепак, се чини дека победата со неверојатно тесен број гласови ги дополни нивните проблеми. (Прес ТВ)