Саботерија и неделатрија на Канал 103

Музичкото радио „Канал 103“ со нова програмска шема се подготвува за одбележување на 20-годишнината од своето постоење. Две нови емисии ќе ја збогатат и освежат програмата на радиото: Саботерија (сабота од 12 до 16 часот) и Неделатрија (недела од 12 до 16 часот).

Саботерија е емисија предвидена да овозможи простор за културна и остра дебата, на страна од дневно-политичките порази. Овој програмски појас на „103-ка“ ќе се стреми да поставува фокусирани и важни прашања, промислувајќи теми како: проблемите на главниот град, културните политики, различните животни стилови, новите начини на уредување и управување со заедницата, улогата на новите медиуми во овие процеси...

Во првото издание на Саботерија (вечерва од 12 до 16 часот) централна фигура ќе биде сликарот Ацо Станковски, во последно време актуелен со провокативните ставови околу проектот „Скопје 2014“. Инспиративниот претставник на новата генерација општествени активисти, Анастас Вангели, ќе им опонира на ставовите на етаблираниот уметник. Групата „Бернаис пропаганда“ ќе ја најават скопската промоција на вториот албум „Мај персонал холидеј“, давајќи свои одговори на прашањата за Скопје. Во премиерното издание на Саботерија гостин ќе биде и Матеј Богдановски, актуелен со издавањето на својот деби-стрип, насловен „Скопје радост ти ќе бидеш“, инспириран од хоророт/хуморот на скопската преродба.

Неделатрија, пак, ќе се занимава со културниот аспект на живеењето кај нас и ќе обработува теми од литературата, филмот, театарот, сликарството и, се разбира, музиката. Првото издание на Неделатрија (14 ноември од 12 до 16 часот) ќе понуди осврт и разговори со учесниците на фестивалот „Синедејс“. Независната театарска продукција кај нас ќе биде претставена преку разговор со режисерката Нела Витошевиќ, по повод нејзината претстава „Брод за кукли“. Неделатрија ќе се осврне и на новите книги на издавачката куќа „Или-или“. (Т.И.)