Италијанско вино именувано според „Пред дождот“

Во чест на филмот „Пред дождот“ на Милчо Манчевски во Италија е именувано квалитетно италијанско бело вино „Прима дела пјоџа“ - „Пред дождот“, кое е промовирано во Парма на 5 ноември.

Виното го создале врвни италијански стручњаци за вино од бербата во 2009 година, а негов кум е италијанскиот новинар и експерт за вино, Марко Поцали, кој го крстел во соработка со енологот и винар Салво Фоти, сопственик на винарница во Сицилија.

„Пред дождот“ пред 16 години во Венеција го освои „Златниот лав“ и уште 9 други награди, а во Италија беше и филм на годината.

„Фантастична емоција во тркалезниот круг на времето”, изјавил за филмот Поцали, а пак Манчевски за виното рекол: „Супер се погоди што е во прашање баш италијанско вино, оти омилени ми се вината од Јужна Италија“.

Виното „Прима дела пјоџа“ е создадено од сортите грозје кариканте, греканико, минела и ризлинг, кои се одгледани на лозјата на северната страна на Етна, во градот Бронте. Произведени се само 400 шишиња на чија етикета пишува: „Во спомен на филмот ’Пред дождот’, 1994, Милчо Манчевски, Скопје, Македонија”, а е парафразирано и мотото на филмот „Времето не чека, оти кругот не е тркалезен“. (К.Р.)