Сите деца родени по 1 јануари 2008 година од вчера почнаа да ја примат задолжителната и бесплатна вакцина против хемофилус инфлуенца тип Б (ХИБ). Најчести заболувања предизвикани од оваа бактерија се менингитис, пневмонија, епиглотитис, септеичен артритис и фебрилна бактериемија, а од човек на човек се пренесува преку воздух при кашлање, кивање и дишење по пат на Флигеовите капки. Министерот за здравство Бујар Османи вчера присуствуваше во поликлиниката „Јане Сандански“ на почетокот на новата задолжителна вакцинација наменета за младите генерации. „Новата вакцина е дел од програмата за имунизација на населението во рамките на напорите на Министерството за здравство и Владата за спречување тешки заболувања. Според податоците на Светската здравствена организација, бактеријата е причинител на повеќе од 3 милиони случаи на менингитис, односно воспаление на мозочната обвивка на годишно ниво и на околу половина милион смртни случаи кај деца до пет години“, изјави Османи. (МИА)
