Кураторски проект и концерт на „Скопско лето“
Во рамките на „Скопско лето“, вечерва ќе се случат два настана од областа на музиката и сликарството. На Факултетот за ликовна уметност (Сули-ан) во 21 часот концерт ќе одржат Женскиот младински хор и Мандолинскиот оркестар при Младинскиот културен центар, под диригентство на Сашо Татарчевски. На програмата се дела од Скаловски, Прокопиев, Бах, Вивалди, Глук... Концертот ќе заврши со перформансот „Од мома до невеста“ чија музичка обработка ја направи Сашо Ливрински, сценското обликување е на Ивона Опетческа-Татарчевска, како солист на кавал ќе се претстави Јордан Митев, додека солист на тапан е Бајса Арифовска.
Во 19,30 часот, пак, па се до 21,30, ќе се случува кураторскиот проект „Автореференца/Самоиронија“ на ДЛУМ, чија цел е да се промовираат јавните градски површини преку уметнички акции и перформанси. Проектот, чиј куратор е Нада Пешева, вклучува тројца млади автори од македонската ликовна сцена кои на различни локации, односно на три пешачки пункта, ќе постават свои инсталации. Во 19,30 часот на булеварот „Св. Климент Охридски“ ќе биде поставена инсталацијата „Помеѓу двете цркви“ на Оливера Бендеска-Чавриќ, потоа во 20,30 часот на платото пред Домот на АРМ ќе биде поставена инсталацијата „Исповедите на еден јадач на колачи“ на Ѓорѓи Јовановиќ, додека во 21,30 часот на плоштадот „Македонија“ посетителите ќе може да ја видат инсталацијата „Јас и моите пријатели“ на Методија Ангеловски. (Т.И.) |
