Бизнисмените од Торино ја сакаат автомобилска индустрија во Македонија
Во следните месеци десетина италијански фирми треба да дојдат во Македонија
Можностите што ги нуди Македонија во областа на автомобилската индустрија, обученоста и цената на расположливата работна сила, развиеноста на инфраструктурата, како и висината на даноците и посебните погодности што ги нудат технолошко-индустриските развојни зони, побудија најголем интерес кај италијанските фирми на вчерашната презентација за поволностите за инвестирање во Македонија што се одржа во Торино. На средбите во Асоцијацијата на производителите од автомобилската индустрија на Италија - АНФИА, договорено е во следните неколку месеци десетина италијански фирми да дојдат во Македонија за директно да се запознаат со условите што ги нуди земјава во областа на автоиндустријата.
„Со нив треба да разговараме поединечно, да им покажеме со што располагаат нашите компании за автомобилската индустрија и да видиме која од нив има амбиции да го прошири својот бизнис“, изјави вицепремиерот Зоран Ставрески на промоцијата во Стопанската комора на Торино.
Тој истакна дека презентирањето на можностите за инвестирање во Македонија е процес на постојано објаснување и убедување за она што им се нуди на потенцијалните инвеститори, но дека останува на нив да дојдат и да се уверат во тоа.
Министерот за финансии, Трајко Славески, истакна дека голем интерес на презентациите имало и за даночната сфера и можностите што ги нуди Македонија во индустриските зони. Тој потенцира дека растот на трошоците на работната сила во Романија и во Словачка за италијанските инвеститори е најголем проблем и тие побарале гаранции дека нема да се случи тоа и во Македонија. (МИА) |
