Париз со концерт против Саркози

Видни личности од левицата и луѓе од уметноста, како филозофот и писател Бернар-Анри Леви и градоначалникот на Париз, социјалистот Бертран Доланое, учествуваа на митинг-концерт (во неделата) против безбедносната политика на претседателот Никола Саркози.

Протестот под наслов „Не допирај ја мојата земја“ беше организиран од асоцијацијата „СОС-расизам“, која се бори против расната дискриминација, и весникот „Либерасион“.

Учесниците изразија незадоволство од политиката на протерување Роми, спроведена од страна на Саркози.

„Дејствата против Ромите се дејства против Франција и Европа“, изјави Бернар-Анри Леви, сметајќи ја за политичка грешка на Владата поврзаноста на криминалот и имигрантските заедници. Градоначалникот на Париз истакна „ова не е нашата Франција - затворена, агресивна, која ја користи омразата за изборни и политички цели“.