Мировници шверцувале бензин во Косово

Во Украина изби скандал затоа што нејзини војници продавале бензин на косовски Абанци

МОСКВА - Информацијата што ја објави весникот „Огледало на неделата“ во Киев дека украински мировници шверцувале бензин што им го продавале на косовските Албанци веќе се претвори во голем политички скандал. Според податоците на истражните органи, украинските војници во составот на КФОР во периодот од 2006 до 2009 година препродавале бензин што го довезувале од Бугарија, а на кој не се плаќала ��икаква царина.

Интересно е тоа што Министерството за одбрана на Украина тврди дека не добило официјално соопштение за махинациите што ги правеле нивните мировници во Косово. Главната управа за контрола во вооружените сили на Украина утврди дека од декември 2006 година до октомври 2007 година со фалсификувани службени документи од Бугарија 42 пати е довезувано гориво за препродажба во количина од 1.275.928 литри чија вредност била 688.000 евра, а од 12 мај до 30 јули 2008 година 82 пати било довезено гориво во вредност од 1.986.309 евра. Подоцна уште 22 пати беше довезуван бензин, од јануари до јули, во вредност од 286.000 евра.

Освен тоа, украинските мировници продавале сертификати за купување гориво, наводно, за својот воен контингент, што им давале за право без царина да увезуваат гориво. Еден таков документ го продавале за 2.000 евра. Украинските мировници во Бугарија се поврзале со фирмата „Лукоил нефтохим Бургас“, која ги користела споменатите документи за незаконски операции со продажба на гориво што од нив го прекупувале албански сопственици на бензиски пумпи во Косово. Горивото од Бугарија пристигнувало во Македонија, а потоа во Косово.

Другата „формула“ што ја користеле украински мировници на Косово била уште поедноставна. Од 2006 година купувале поевтин бензин во француската база на КФОР, која се наоѓа на Косово по што им го продавале на приватниците. Во една рунда земале по 30 тони гориво по што во препродажба заработувале по 15.000 евра. Досега се утврдени околу сто такви операции.

Украина во Косово има 98 свои војници кои служат во заедничкиот баталјон со Полјаците. На 2 август годинава Украинците ја почнаа замената на својот контингент на Косово. (Б.В.)