Претходен број

Жан Клод Јункер: Македонија не треба да се смета за изолирана

Во Брисел се чудат како успеала Владата да пресмета дека се остварени 75 отсто од обврските од ЕУ

Од нашиот дописник
Слободанка Јовановска

Брисел - Премиерот на Луксембург, Жан Клод Јункер, оцени вчера дека би било глупаво Европската унија да ја изолира Македонија, ниту пак Македонија треба да се опишува себеси како таква држава. „Мислам дека сум добар пријател на Македонија и и' се восхитувам на земјата поради огромните постигнувања досега. Наскоро нив ќе ги разгледаме во новата светлина и ќе направиме процена. Но, не мислам дека кој било има намера да ја изолира Македонија. Тоа би било глупаво од наша страна, а и Македонија не треба да се опишува себеси како изолирана земја“, изјави Јункер за „Утрински весник“, коментирајќи ги оцените на премиерот Никола Груевски дека, без оглед што ќе постигнеме и колку услови ќе оствариме, нема да добиеме датум за преговори со Унијата.

За Јункер, како и за повеќето еврофункционери и лидери во ЕУ, Македонија во моментов е ставена настрана, па нема да биде тема ни на следниот состанок на министрите за надворешни работи идната недела. Засега, за нас се расправа само на нивоата на Европската комисија, од каде што доаѓаат сигнали на разочараност од тактиката што ја одбра македонската влада која, сакајќи да го менаџира неуспехот од евентуалното недобивање датум за преговори во декември, се' повеќе го вперува прстот кон Брисел.

Според дипломатските оцени овде, префрлањето на вината врз Европската унија е опасна политика на премиерот Никола Груевски, кој место поддршка создава се' повеќе непријатели на земјата. Тие причините за евентуалното недавање датум ги гледаат многу повеќе во незаинтересираноста на Владата да оствари здрав политички дијалог во земјата, посочувајќи ја како пример незаинтересираноста да се реши кризата со СДСМ и опозицијата да се врати во парламентот, настан што се случуваше за време на одморите.

Во Брисел се чудат, исто така, како успеала Владата да пресмета дека се остварени 75 отсто од обврските добиени од Европската унија со осумте бенчмаркси, како да станува збор за техничка и математичка операција. Како се утврдува дека сте оствариле 75 отсто од независноста на судството, од непартизација на администрацијата и слично, се прашуваат во ЕУ, оценувајќи дека е дискутабилен и начинот на кој беа усвоени над стоте закони со кои Владата се пофали во Брисел, бидејќи поминаа без дебата околу и низ непотребни ургентни процедури.

Во однос на остварувањето на реформите во полицијата оцените се позитивни, но и резервирани, поради фактот дека многу од именувањата се завршени, реформите се спроведуваат, но учеството на полицајците во грубите изборни инциденти зборува дека стандардите, според кои треба да функционира таа, се' уште не се достигнати.

Во ЕУ чекаат епилог од изборните инциденти, а како пример за проблематичната независност на судството ја посочуваат смената на двајцата судии инволвирани околу случајот „Заев“.

Очигледно, наспроти намерите во Владата за неуспехот Македонија по три години да добие датум за преговори со Унијата да ги обвини ЕУ и Грција, во Брисел имаат други објаснувања, со порака дека за земјата е подобро да се исполнуваат суштински барања место да се мавта со бројки и обвинувања кои не ја водат никаде државата.