ПОСЛЕДЕН ЗБОР

Милош Билбија 1948 -2010, археолог

Завчера во Скопје по тешко боледување почина Милош Билбија, археолог, долгогодишен истражувач на праисторијата, познат како пронаоѓач на познатата неолитска скулптура „Адам“ од Говрлево.

Тој е роден на 26 февруари 1948 година во Бос, Грахово, во Босна и Херцеговина, а дипломирал во 1973 година на Филозофскиот факултет во Белград, на Катедрата за археологија. Работеше во Музејот на град Скопје, како виш кустос во Одделението за археологија, а во неговата богата професионална биографија остануваат забележани систематските археолошки истражувања на неолитските и металодобните култури во Скопската Котлина, на локалитетите Скупи, Чрне - Маркови Кули во Скопје, Говрлево, во Матка - Михајлова пештера, во истражувањата на праисторијата во Славонија, Хрватска, на локалитет Церје во Словенија и други.

Милош Билбија беше член на Македонското археолошко научно друштво. Тој секогаш ја потенцираше научната и цивилизациска вредност на археологијата и во секоја прилика безрезервно го ширеше жарот на вистинските пронаоѓачи што оставаат трага во историјата.

Погребан е вчера на Градските гробишта „Бутел“.