„Неверство“ од Пинтер во Културниот центар ЦК

Театарската претстава „Неверство“ по текст на нобеловецот Харолд Пинтер, во режија на Нина Николиќ од вчера до 30 април ќе се игра во Културниот центар ЦК во Скопје во 20,30 часот.

Во главните улоги настапуваат актерите Благој Веселинов, Мартин Јорданоски и Дарја Ризова. Проектот е во продукција на Центарот за драмски уметности Т-ХАУС.

„Драмата се базира според вистинска приказна од животот на Пинтер. Се зборува за сложениот однос меѓу сопружниците Роберт и Ема и најдобриот пријател на мажот, Џери, со кого Ема има љубовна врска. Оваа претстава го обработува неверството во поширока смисла на зборот - неверството кон партнерот, кон пријателот, кон самиот себе“, информира организаторот.

„Неверство“ премиерно беше прикажана во декември минатата година и досега се распродадени повеќе од 20 изведби. Секоја изведба на претставата можат да ја следат 28 посетители. (Н.П.)