„Лукоил“ отвори две бензински пумпи во Скопје и во Штип
„Лукоил“ во петокот и во саботата отвори две бензински пумпи во Скопје и во Штип, со што бројката на бензински станици на оваа компанија во земјава достигна шест.
„Се надевам дека до крајот на годината ќе успееме да ја пуштиме и петнаесеттата бензинска станица во земјава. Задоволни сме со бизнис-амбиентот и со односот на Владата спрема нас. Градиме објекти каде што на луѓето ќе им биде удобно да поминат, да наточат квалитетно гориво и да се одморат. Ќе продолжиме со позасилено темпо да работиме на реализација на програмата за отворање 40 бензински во Македонија“, изјави во петокот директорот на „Лукоил“ - Македонија, Андреј Михајлович Куку, на отворањето на бензинската пумпа на ул. „Првомајска“ во Скопје. Вредноста на објектот што се простира на површина од 2.500 квадратни метри изнесува над милион евра. Ќе работи 24 часа и ќе се продаваат сите видови горива, а наскоро и Евро 5. „Лукоил“ наскоро ќе почне да гради бензински во Струмица, уште една во Скопје и во Велес.
Новиот објект беше осветен од поглаварот на МПЦ, г.г. Стефан, а лентата ја пресекоа градоначалникот на Општина Кисела вода, Џорџе Арсов, директорот Куку и амбасадорот на Руската Федерација во Македонија, Владимир Солоцински. Солоцински при отворањето на бензинската во Штип порача Македонија да не потклекне пред целта за прилив на странски инвестиции.
„Недобивањето покана за влез во НАТО воопшто не е критериум земјата да важи како место со ризик за инвестирање. Напротив, ’Лукоил‘ е пример за можноста за оплодување на странскиот капитал на овие простори“, рече Солоцински. (Ек.Р.) |
