„Баханалии“ во Велешки театар во чест на Мето Јовановски

Театарот „Јордан Хаџи Константинов-Џинот“ вечерва со почеток во 19,30 часот ќе ја изведе претставата „Баханалии“ од Горан Стефановски, во режија на Наташа Поплавска. Претставата се игра во чест на актерот Мето Јовановски, кому вечерва свечено ќе му биде врачена актерската награда за животно дело „Петре Прличко“, во рамките на одбележувањето на 9 Ноември - Денот на Општина Велес.

Мето Јовановски има одиграно голем број улоги во театарски претстави, но и филмски ролји. Тој одигра забележливи ролји со Петре Прличко во серијата „Комедијанти“, како и во претставите на Чехов и на филмското платно: во незаборавните „Среќна нова ’49“ и „Тетовирање“. Нагласи дека секоја од улогите за него е драгоцена и посебна.

Наградата „Петре Прличко“ е востановена во 2006 година на иницијатива на Општина Велес, Народниот театар „Јордан Хаџи Константинов-Џинот“ од Велес и Здружението на драмски уметници на Република Македонија „Џинот“. (Н.П.)