„Свети Никола“ место Бурмали -џамија

Деспина Трајковска


Ниту Бурмали џамија ниту Градска куќа, туку црква „Свети Никола“ да се изгради на местото на некогашниот Офицерски дом на скопскиот плоштад „Македонија“. Ваква иницијатива вчера до Општина Центар поднесе НВО „Деница“ со образложение дека на тоа место пред да се изгради џамијата во 1495 година, имало црква во чест на светецот Никола.

Градоначалникот Владимир Тодоровиќ дури денеска ќе го каже својот став околу ова барањето. Сепак, пресудна одлука дали воопшто ќе се гради каков било верски објект на плоштадот ќе биде таа на општинскиот Совет, кој денеска треба да одлучи дали да се распише референдум за црквата. Во случај на распишување и успешен референдум, на централниот скопски плоштад нема да се дозволи изградба на каков било верски објекти.

Но, и покрај се', ниту од МПЦ ниту, пак, од Иницијативниот одбор за возобновување на Бурмали-џамијата не се засегнати од актуелните случувања. Оптимистички на своите намери гледаат и од граѓанските здруженија кои се противат на изградба на црква и џамија на плоштадот „Македонија“.

Црковните власти ја купија парцелата за црквата, но од граѓанските здруженија сметаат дека овој факт е ирелевантен за да ја гарантира изградбата на храмот. Според членовите на „Граѓани за европска Македонија“ и „Плоштад слобода“, правото на сопственост на градежната парцела истовремено е безначајно, како што велат, ако се имаат предвид очекувањата од иницијативата за распишување референдум.

„Фактот што МПЦ го купи земјиштето воопшто не не' засега, бидејќи по успешниот референдумот, одлуката ќе биде обврзувачка за реализација, па така црквата во ниту еден случај нема да смее да се реализира, се' ќе биде беспредметно. Од друга страна, пак, продажбата на парцелата на МПЦ под повластена цена и услови за нас е уште еден доказ за силната врска помеѓу власта и Црквата, независно што начинот на купопродажбата надлежните го објаснуваат со законските процедури. Инаку, веруваме дека референдумот ќе успее ако ги имаме предвид досегашните наши истражувања на мислењето на жителите на Центар. Единствено не сме сигурни дали Советот ќе ја прифати иницијативата за распишување референдум, бидејќи, генерално, советниците гласаат по партиско убедување, а не во интерес на граѓаните. Сепак, ако иницијативата не помине, сигурни сме дека ќе ги собереме потребните потписи како услов за распишување референдум“, рече вчера Никола Наумовски, претставник од „Плоштад слобода“, здружение кое се противи и на најновата иницијатива за изградба на „Свети Никола“ на местото на некогашниот Офицерски дом.

Од НВО „Деница“, кои се подносители на таа ��ницијатива, пак, сметаат дека изградбата на храмот треба да се реализира како должност на оваа генерација граѓани за обновување на местата кои го симболизираат ропството.

„Несериозни претензии за многу сериозна работа“, е коментарот на Иницијативниот одбор за возобновување на Бурмали-џамијата на барањето на „Деница“. „За нас е несериозна, но истовремено и неоснована новата иницијатива. Не сакаме да влегуваме во спор со никого кога почнала и кога завршила историјата. Бурмали-џамијата се испразнила на празно, чисто место за што сведочат османлиските архиви“, вели Рамадан Рамадани од Иницијативниот одбор за џамијата, кој укажа дека нивното барање никој не може да го „победи со игнорирање“.

Рамадани потенцираше дека и покрај сите случувања, Одборот не се откажува од намерите за изградба на џамијата на местото на некогашниот Офицерски дом. ИВЗ и понатаму инсистира да го добие земјиштето во владение и покрај тоа што според важечкиот урбанистички план, на тоа место нема маркичка за изградба на верски објект.

Настаните околу барањата за изградба на верски објекти на плоштадот „Македонија“ во Скопје вчера предизвикаа реакција и од ДОМ на Лилјана Поповска. Од оваа партија бараат мораториум за градскиот плоштад, односно, како што рекоа, до смирување на страстите помеѓу верските заедници и јавноста, на плоштадот да не се дозволи изградба на никакви објекти, а најмалку од се' - верски. (Дс.Т.)