...И уште нешто

Промоција

Агенцијата за млади и спорт почнува со реализација на „Најдоброто од Македонија - Музика“, проект за промоција на македонските забавни, народни и детски песни кои изминатите 20 години оставиле белег на македонската музичка сцена, по својата популарност или квалитет. Од вчера до 20 август ќе има гласање на интернет за најдобра песна.

Транспарентност

Преку новини во тестирањето на кандидатите при вработување во државните институции ќе се зголемува транспарнетноста во овој процес. Ќе се применува и нов систем на мобилност од една во друга институција со што ќе се балансира суфицитот и дефицитот на кадрите, најави министерот Иво Ивановски.

Авионско прскање

Утре и задутре, од 5:30 до 8 часот ќе се изврши аеросолна авионска дезинсекција против комарци. Аеросолно прскање од земја е планирано во следните пет дена, од понеделник до петок, 8-ми до 12-ти август. Ќе почне еден час по полноќ и ќе трае до 5 часот наутро. Како што соопшти Град Скопје, ова е трето прскање против комарци од земја и воздух годинава.

Протест во Лаки

Жителите на селото Лаки, виничко, протестираат поради зголемениот обем на сеча на шумскиот фонд над селото, како и поради напукнатите зидови на семејните куќи кои се наоѓаат покрај патот по кој минуваат тешките камиони. Тие бараат од Македонски шуми сечата да се одвива 1 километар над селото, за да се заштитат куќите од ерозија.

Крива Паланка

Во еднодневна работна посета во Крива Паланка престојуваше Стивен Куци шеф на Канцеларијата на мировниот корпус во Македонија. Куци беше примен од крвопаланечкиот градоначалник Арсенчо Алексовски, кој го запозна накратко со личната карта на општината, за проблемите со кои се соочува, како и за развојните програми.