Проработи Градскиот базен во Охрид

Охрид - По цела деценија пауза, вчера беше пробно предаден во употреба реконструираниот градски базен. Веќе од средината на идната недела официјално охриѓани и нивните гости повторно ќе пливаат и ќе се рекреираат на единствениот базен во градот. Истовремено, стартуваат со работа и школите за пливање и за ватерполо, кои ќе ги водат професори по физичка култура, предводени од професор Соња Думбалова.

Со реконструираниот градски базен ќе стопанисува ЈП „Билјанини Извори“, од каде што најавуваат можност објектот во скора иднина да биде покриенза да може да се користи во текот на целата година. Друг базен нема ниту во Охрид ниту во Струга, бидејќи хотелите, како што се „Инекс-Горица“ и „Метропол“, на местата на базените направија конгресни сали. Базенот ќе биде отворен од 9 до 20 часот. Во тој период свои термини ќе имаат школите за пливање и за ватерполо, додека за граѓаните е резервиран терминот од 12 до 18 часот и тоа за симболична цена од 60 денари.

Базенот во Охрид е со олимписки димензии, 50 метри должина и 25 метри широчина, додека длабочината изнесува два метра. Директорката на ЈП „Билјанини Извори“, Гордана Јованоска, изјави дека покрај големиот базен, за најмладите атрактивен ќе биде и малиот базен. „Го оспособивме и малиот базен за децата, кој е идеален за учење пливање. Очекуваме оттука да излезат некои нови надежни пливачи, по примерот на Александар Маленко“, вели Јованоска.

Простор околу базенот ќе биде облагороден со трева и украсни дрва. Покрај првите лежалки што се веќе поставени за официјалното пуштање во употреба, во наредниот период ќе се дополнува со спортско-рекреативни реквизити. (В.М)