Најкрвави судири на Тајланд за18 години

БАНГКОК - Засега е познато дека најмалку 20 лица загинаа во судирите меѓу тајландските сили и симпатизерите на опозицијата во Бангкок, а повеќе од 800 се повредени. Најлошото насилство се случи кога во саботата вечерта војската и полицијата имаа неуспешен обид да ја вратат контролата врз областа што ја држат поддржувачите на опозицијата. Тие употребија солзавец и гумени куршуми, додека демонстрантите фрлаа по нив со молотови коктели, во најкрвавото насилство во последниве 18 години. Портпаролот на владата ги негира информациите дека била употребена боева муниција. „Не се стрелаше со боева муниција кон демонстрантите“, изјави Панитан Ватанајагон на националната телевизија“, објави новинската агенција АФП.

Меѓу загинатите во саботата има најмалку четворица војници. Стотици симпатизери на опозицијата облечени во црвени кошули, наводно, со употреба на сила стигнале до владините канцеларии во северните градови Чијанг Маи и Удон Тани во знак на протест против преземените остри мерки во главниот град на Тајланд. И безбедносните служби и владата на премиерот Абхисит Веџаџива ветија дека ќе покажат воздржаност во справувањето со демонстрантите, со цел да се избегне повторување на минатогодишните безредија кога двајца демонстранти ги загубија животите. Во информациите од Бангкок вчера изутрина се наведуваше дека ситуацијата во градот со 15 милиони жители изгледа смирена откако, де факто, стапи во сила примирјето. (Би-Би-Си)