Министерството за здравство плаќало поскапи услуги

Министерството за здравство на здравствените установи им плаќало поскапи услуги од цените утврдени со државните здравствени програми, со што државниот буџет е оштетен за околу 2,3 милиони евра. Ова го констатирале државните ревизори од направените контроли во Министерството за здравство за 2009 година.

Бројни неправилности се утврдени во реализирањето на овие програми, но и во севкупното работење во Министерството, од водење евиденција за работното време, несоодветно чување фактури (во кутии), како и нивна несоодветна евиденција и контрола, до премногу набавени вакцини поради што на некои пратки им изминал рокот на употреба...

Државните ревизори откриле и бројни пропусти и недоследности во постапката за изградба на дијагностички центар во Клиничката болница во Тетово, при што утврдиле дека првичната вредност на договорот била надмината за триесетина проценти поради дополнително утврдени трошоци. Ревизорот не се уверил во причината за поскапување на изведбата.

Недоследности се утврдени и во проектот за амбуланти во руралните подрачја, односно во предвидениот рок не е изграден ниту еден објект.

„Констатираните недоследности се резултат на пропустите во административната постапка, а не на свесна намера со што би се оштетил буџетот на РМ“, велат од Министерството за здравство. (Ј.Ј.)