ЕУ отвора фронт против имигрантите

Брисел - Во Грција ќе бидат испратени европски екипи за брза гранична интервенција, со цел да и' помогнат на земјата во јакнење на контролата на копнената граница со Турција, соопшти Европската комисија. Таквата акција е по барање на Грција кон европската агенција Фронтекс, која ги координира активностите во Европската унија во областа на граничната контрола на надворешните граници на Унијата.

Првото испраќање европски екипи за брза гранична интервенција по нивното формирање во 2007 година се наметнува поради бранот илегални имигранти во Грција, особено во 12,5 километарската гранична линија во близина на грчкиот град Орестиада, нагласува ЕК.

Овие екипи се активираат кога земја-членка на ЕУ се соочува со итна и вонредна состојба во делови од надворешните граници, предизвикани од обидите на голем број граѓани од трети држави да влезат илегално на нејзината територија. Според ЕК, екипите што ќе бидат испратени во Грција ќе се потчинуваат на грчките власти и ќе останат во земјата за определено време.

Ситуацијата по копнената граница на Грција со Турција предизвикува се' поголема загриженост. Бројот на лицата што ја преминуваат границата илегално достигна алармантни димензии и, очигледно, Грција не е во состојба да се справи сама со проблемот.

„Го следев развојот на настаните многу внимателно и бев во близок контакт со грчките власти и со Фронтекс. Вчера бев известена за барањето на грчката Влада да биде укажана помош од екипите за брза гранична интервенција. Веднаш е активиран механизмот за соработка со Фронтекс и сега Грција ќе ја искористи европската солидарност во управувањето со надворешните граници на унијата“, изјави еврокомесарот Сесилија Малмстром, која е одговорна за внатрешни работи.