Европската десница бара референдум за прием на Турција

АНКАРА - Турција од 2005 година преговара за кандидатура за членство во ЕУ, но со мал успех. Ултрадесничарските партии тврдат дека таа земја претставува „закана за идентитетот на Европа“ и планираат референдум што би го блокирал нејзиниот влез во Унијата.

Неколку ултрадесничарски европски партии побараа во сите земји на ЕУ да се организира референдум за барањето на Турција за членство во ЕУ. Тоа е заклучокот од дводневниот собир во Виена на тема „Ситуацијата во ЕУ по Лисабонскиот договор“. На собирот учествуваа австриската Партија на слободата, белгиската партија Фламански интерес, Шведските демократи, данската Народна партија и други. Во центарот на вниманието беше кандидатурата на Турција за членство во ЕУ.

Преговорите околу кандидатурата за членство во ЕУ Анкара ги почна во 2005 година, но тие не отидоа далеку поради спорот со Кипар, но и отпорот на други членки на ЕУ, како што се Франција и Германија.

Лидерот на австриската Партија на слободата, Хајнц Кристијан Штраке, се заложи против пристапување на Турција кон европскиот блок и најави дека неговата партија ќе поттикне граѓанска иницијатива низ Европа, со цел блокада на приемот на Турција.