Атина бара објаснување од САД за Рикер

Од нашиот дописник
Миркица Поповиќ


Атина - Грција побарала објаснување од САД за изјавата на американскиот амбасадор во Скопје, Филип Рикер, со која се дава поддршка за решение на спорот за името со двојна формула, кое директно се коси со грчкото барање за име за општа употреба, односно ерга омнес. Портпаролот на грчкото Министерство за надворешни работи, Григорис Делавекурас, вчера истакна дека и покрај шпекулациите за тајна дипломатија, сепак, преговарачкиот процес се одвива исклучиво директно меѓу преговарачите од двете држави, во рамките на Обединетите нации и со помош на Метју Нимиц. Затоа, изјави тој, коментарите од други држави, кои не се директно вклучени, понекогаш само го отежнуваат процесот.

„Изјавите што се надвор од рамките на преговорите не му помагаат на преговарачкиот процес. Не знам која била целта, ни врските на амбасадорот Рикер за да ги даде овие изјави. Ние побаравме објаснување од американската страна за основата и за причината за дадената изјава“, истакна Делавекурас.

Портпаролот на грчкото МНР потврди дека најверојатно ќе биде остварена средба меѓу премиерот Јоргос Папандреу или заменик-министерот за надворешни работи, Димитрис Друцас, со медијаторот Метју Нимиц во Њујорк за време на Генералното собрание на ОН. „Ние сакаме и ќе се потрудиме да договориме ваква средба“, изјави Делавекурас, додавајќи дека доколку премиерот Никола Груевски е во Њујорк, веројатно ќе има средба и со него. Беше потенцирано дека грчката страна сака вакви средби и смета оти се неопходни за да се подобри климата за решавање на спорот иако, како што велат, Владата во Скопје се' уште не прави никакви чекори за да се придвижи процесот кон дефинитивно решавање.

Од грчкото МНР повторуваат дека веќе на сите им е позната решителноста на Грција да се најде решение за спорот, но оти грчката страна не може да направи ништо доколку Владата во Скопје не покаже конструктивен пристап во преговорите. Грција инсистира Владата на Груевски да покаже придвижување и заинтересираност за да се најде компромис за спорот што трае веќе две децении.

„ФИРОМ е на крстопат кон својата иднина во НАТО и во ЕУ и многу брзо може да си го осигура влезот во Алијансата и да го забрза пристапниот процес во Унијата. Меѓутоа, со сегашниот став на Владата во Скопје не гледам шанси да се случи нешто такво“, изјави Делавекурас, дополнувајќи дека нема да се измори да повторува оти е потребно Владата во Скопје, конечно, да направи чекор напред кон решавањето на долгогодишниот спор.

Делавекурас ги негираше медиумските сценарија оти е веќе договорено името „Вардарска Македонија“ и дека ќе дојде до решавање на спорот веднаш по локалните избори во ноември во Грција. Напротив, нагласи дека доколку македонската страна се однесува позитивно во преговорите и се согласи за компромисно решение, тогаш Грција би била среќна уште утре да се најде решение и да се стави крај на спорот. (М.П.)