Прелудиуми и фуги од Бах со Марија Тренчевска
Во организација на Музичката младина на Македонија, вечерва во Музејот на град Скопје во 20 часот, младата пијанистка Марија Тренчевска ќе го продолжи рециталот кој го почна вчера, а на кој таа ги изведува 24 Прелудиуми и Фуги од Јохан Себастијан Бах.
Тренчевска во моментов е студент по пијано на Факултетот за музичка уметност во Скопје во класата на доц. Марија Ѓошевска. Досега има одржано повеќе рецитали и полурецитали, учествува на меѓународни натпревари и е добитник на голем број на награди. Редовен учесник е на меѓународниот семинар по пијано на МММ под раководство на проф. Борис Романов.
Инаку, интегрална изведба на 24 Прелудиуми и Фуги од Бах е мошне ретка не само кај нас, туку и во светот. Заради комплексноста на музичките творби и нивното времетраење, но и поради физичката издржливост, концентрација и меморијата кај пијанистите. 24 Прелудиуми и Фуги всушност ја чинат познатата збирка „Добро темпериран клавир“ на големиот мајстор на музиката Ј.С. Бах. (Т.И.) |
