Претходен број

Поглед

Каде се кандидатите

 Соња Крамарска

Најголемите политички партии ВМРО-ДПМНЕ и СДСМ, очигледно, се' уште немаат кандидати за претседател на државата. Изборите треба да се одржат на 15 март идната година, а раководствата и на двете партии немаат претстава кои ќе им бидат кандидати.

Ова е поразително сознание. Претседателската функција во државата е највисока и најпрестижна и воопшто не треба да биде сеедно кој ќе седи во претседателскиот кабинет. Во други земји, на претседателските избори не само што им се придава големо значење и ги издигнуваат на ниво на најважен политички спектакл туку подготовката на кандидатите трае со години.

Кај нас не е така. Кај нас остануваат уште пет месеци до изборите, а ние не знаеме кои се кандидатите. Изгледа на партиите, чијашто машинерија го избира претседателот, им е поважно дали ќе најдат личност која лесно ќе ја контролираат отколку квалитетот на кандидатот за претседател. Затоа и ни се случува на високи функции да доаѓаат случајни луѓе кои подоцна не можат да се снајдат.

Со оглед на фактот што претседателот во Македонија се избира на непосредни избори, вистинска катастрофа е што формалните партиски номинации се случуваат во последен момент. На претседателските избори што наближуваат граѓаните ќе гласаат за личност што партиските врвови ја лансирале „неколку часа“ пред изборите. Во зависност од процената на партиските лидери дали таа личност им е доволно лојална за да ја наградат со највисоката функција.

Но, тоа е така, всушност, и со некои други високи функции. Сепак, штета е и опасно што истата формула се применува и за највисоката функција.