ЕВН во Бугарија со проект од 500 милиони евра

Виена - Австриската енергетска корпорација ЕВН и бугарската Национална електрична компанија во Виена потпишаа договор со кој Австријците добиваат мнозински дел од бугарскиот хидроенергетски проект „Горна Арда“. Во согласност со договорот, потпишан од првите луѓе на двете компании, Бургхард Хофер и Красимир Парванов, ЕВН ќе има 70 отсто сопственост во акционерското друштво што ќе стопанисува со хидроенергетскиот систем „Горна Арда“, додека НЕК ќе ги добие останатите 30 проценти.

Со проектот, вреден 500 милиони евра, се предвидува изградба на три хидроцентрали и обновување на постојната брана по каскадата на реката Горна Арда. Проектот треба да обезбеди редовно снабдување со струја на околу 100.000 домаќинства. Хофер рече дека станува збор за проект што е од големо значење за двете страни, додавајќи дека со изградбата на хидроцентралите во Бугарија ќе се отворат 3.000 нови работни места. На церемонијата на потпишувањето на договорот присуствуваше и бугарскиот премиер Бојко Борисов. (МИА)