Лабораторија на модерниот танц

Деновиве почна со работа новиот Истражувачки танцов центар на Рисима Рисимкин

Тина Иванова

Во Драмскиот театар во Скопје, во неделата, беше презентиран нов истражувачки центар, насловен „Рисимкин истражувачки центар“ или накусо РИЦ. Станува збор за лабораторија во која ќе се истражуваат нови насоки во современиот танц, во која ќе се развиваат програми за размена од областа на културата и ќе се развива едукативна програма за деца и млади во областа на танцот.

Првиот проект на Истражувачкиот центар, кој почна со работа годинава, всушност, е буто-лабораторијата, која деновиве се одржува под раководство на еден од најпознатите светски буто-танчари, Катцура Кан. Првиот настан, со неколку кореографски епизоди, се случи токму во Драмскиот театар, на малата сцена. Во проектот учествуваа професионални уметници, како и студентите на „Скопје денс академи“, што е дел од Универзитетот ЕСРА.

Инаку, Кацура Кан, роден во Кјото, е уметник, мајстор за буто-техника од редовите на постарата јапонска генерација на Буто. Настапувал со машката буто-трупа „Byakkosha“ во периодот помеѓу 1979-1981 година, а потоа продолжил со истражување во Индонезија и Тајланд во наредните 20 години. Во 2001 година Кан почнал да работи во Балканскиот регион за новите комуникациски дела. Моментно ја истражува „Бекет БУТО-нотацијата“ во Њујорк, и „Пророштво и енигма“ како Танцов ораториум, проект во Атина.

Буто-техниката, пак, уште се нарекува и „Надреализам на Месо“. Во денешно време е позната како современа танцова форма, иако почнала како експериментален перформанс во 50-тите и во 60-тите години од минатиот век, како едно од јапонските авангардни уметнички движења.

„Сакаме да развиеме една нова истражувачка линија во областа на танцот. Ова е програма на ’Интер-арт‘. Нашата идеја е да каниме гости од надвор што ќе пренесуваат свои искуства. Во план ни е да правиме и резидент-артисти, да гостуваат и македонски танчари, актери, односно сите што сакаат да се занимаваат со изведувачка уметност. Наша цел е да има простор во кој ќе можат младите да се пронаоѓаат себеси, да наоѓаме нови форми, зашто ова е нешто што во Македонија го нема“, вели Рисима Рисимкин, уметничка директорка на РИЦ.

Нејзината идеја е да направи танцов театар, а на таа тема, „Нов танцов театар“, во декември ќе се одржи и конференција чиј организатор е „Интер-арт“. Рисимкин вели дека Истражувачкиот центар ќе развива и едукативна програма за деца, а која ќе почне од септември следната година и ќе биде специјализирана за едукација на млади во областа на современиот, класичниот танц и хип-хоп. „Сакаме да направиме кадар што ќе се едуцира во областа на модерниот и класичниот танц“, вели Рисимкин, чија неодамнешна идеја да отвори и Конзерваториум, се надева набргу ќе стане реалност.