Поглед

Трамвајот наречен желба

Билјана Ангеловска

Трамвајот кој за многу скопјани од поодамна е само неостварена желба, се чини конечно ќе стане реалност. Дваесетина години старата идеја повторно беше реафирмирана со доаѓањето на Трифун Костовски на чело на Скопје. Тој веднаш откако стапи на функцијата ја заговараше идејата за трамвај и упорноста со која настојуваше да ја реализира, очигледно се исплати, бидејќи изградбата ќе стартува уште годинава. Значи, колку скопјани да му се лутат на својот градски татко и да му забележуваат за лошите потези и одлуки, кога на крајот ќе се сумираат резултатите од неговиот четиригодишен мандат, ако Костовски ја оствари својата идеја, ќе остане запаметен по грандиозниот проект, изградба на трамвај во Скопје. А трамвајот, веројатно ќе го добие името „трамвајот на Трифун“.

Ваков потфат во Скопје немало децении наназад, можеби уште од изградбата на Железничката станица. Несомнено, трамвајот ќе значи сосем нова динамика на животот во главниот град, нов сообраќаен режим, ќе придонесе за помала употреба на автомобилите, ќе го олесни протокот на возила. Единствено што не смее да се дозволи тоа е работата да почне, па да запре. Зашто, факт е дека Костовски нема ни минимум пари за да ја истера докрај замислата. Бидејќи желбата не е доволна да го изгради трамвајот, мора да се истрае во намерата, да се стори се' да се обезбедат потребните средства. Мора сите фактори и во градот и во државата да направат големи напори да донесат пари, да ги анимираат и привлечат заинтересираните инвеститори. И секако, новиот градски татко да не го заборави „трамвајот на Трифун“, бидејќи сигурно е дека Костовски нема да може да го заврши проектот во својот мандат, што не значи дека неговиот наследник не треба да го стори тоа.