Насловна

Бошкоски по втор пат ограбен, сега му ја снема „ланчијата“

Нова кражба во куќата на притворениот лидер на Обединети за Македонија

Горан Адамовски


Се случи нова кражба во куќата на претседателот на Обединети за Македонија, Љубе Бошкоски. Украден е автомобилот на поранешниот министер за внатрешни работи, а што е одземено однатре - ќе се утврди по увидот, кој вчера не можеше да биде извршен, бидејќи никој од сопствениците на куќата не беше дома. Од ОМ се сомневаат дека и овој случај е поврзан со неодамнешното апсење на Бошкоски.

Од скопската полиција велат дека вчера околу 10,50 часот кај нив било пријавено оти насилно било влезено во куќата на Бошкоски на Водно.

„Било извршено претурање, одземен е автомобил ‘ланчија‘, најверојатно, со оригиналните клучеви, но не можеше да биде извршен увид, бидејќи ниту еден од сопствениците на куќата не е дома“, велат од СВР - Скопје. Инспекторите од Крим-техника ја запечатија куќата и внатре не може да влезе никој. Дури и сопругата на Бошкоски, Виолета, кога ќе се врати од Хрватска, ќе мора да побара дозвола од полицијата за да влезе дома, по што инспекторите ќе извршат увид.

„И ова објаснување од полицијата е дополнителен сомнеж дека станува збор за добро искоординирана работа“, изјави Наталија Ивчева-Тасева од ОМ.

Во куќата на Водно нема постојани станари откако Бошкоски е во притвор, а сопругата често е во Хрватска. Нивната внука, како и мајката на ексминистерот биле задолжени да проверуваат дали е се' во ред. Но, ноќта спроти понеделникот немало никој. Системот за безбедност, инсталиран во куќата, не работел веќе две години. Еден од сопартијците на Бошкоски, минувајќи по улицата, забележал дека го нема возилото на лидерот, кое со недели стоело пред куќата.

„Кој би можел да го украде тој автомобил, кој беше на вештачење во полицијата откако полицијата тврдеше дека во багажникот пронашла 100.000 евра, кои Бошкоски ги зел во изборната кампања? Нема полицаец што не го знае тоа возило, ако го забележат - веднаш ќе знаат дека станува збор за украден автомобил. Од таа причина, таа ‘ланчија‘ не може ниту да се вози ниту да се продава, па затоа се сомневаме дека кражбата е смислено сценарио на службите“, обвинуваат од ОМ.

Сеф во кој имало неколку пиштоли беше украден од куќата на Љубе Бошкоски пред неколку недели. Овие кражби во куќата на Водно се случуваат додека Бошкоски е во притвор и го чека почетокот на судењето. Тој беше уапсен само еден ден по парламентарните избори во јуни годинава по обид да прими 100.000 евра, со кои требало да ја плати изборната кампања. Неговите приврзаници се убедени дека акцијата „Кампања“ е одмазда на власта спрема лидерот на ОМ.