Тројца загинаа во сообраќајки низ земјава

(03.12.2010г.-13:28ч.) Тројца загинати и еден повреден е билансот на две тешки сообраќајни несреќи што вчера се случија низ земјава.

Татко и син загинаа во несреќа што се случи на патот меѓу Градско и Прилеп, поточно во близина на тунелот кај селото Фариш. Како што соопшти МВР, околу 14,20 часот дошло до директен судир меѓу "форд ескорт", управуван од Никола Поповски (24) од Скопје и камион "Ман", управуван од И.И. (41) од Скопје. Судирот бил кобен за возачот на автомобилот, кој загинал на самото место, додека неговиот татко Страшо Поповски (61) се здобил со тешки повреди, на кои што им подлегнал во кавадаречката болница.

Од полицијата информираат дека едно лице загина, а едно е повредено во тракторска несреќа што се случи околу 10 часот на локалниот пат меѓу струмичките села Иловица и Дрвош. Димитар Илиев (67) од селото Штука, изгубил контрола врз тракторот што го управувал и се превртел, по што починал. Сопатникот Р.И. (71) се здобил со телесни повреди.