Петмина кандидати во трката за јапонски премиер
ТОКИО - Петмина кандидати вчера беа номинирани за иден премиер на Јапонија, при што поранешниот министер за надворешни работи Таро Асо е фаворит да победи во трката и да свика предвремени избори во скоро време. Владејачката Либерално-демократска партија (ЛДП) се надева дека динамична дебата, фокусирана на прашањето како да се балансира потребата за издигнување на несигурната економија на Јапонија, а во исто време да се заузда зголемениот јавен долг, ќе го подобри нејзиниот рејтинг кај гласачите, пред општите избори кои новиот премиер би можел да ги свика во ноември. Отворениот Асо, кој се наоѓа на врвот во гласачките и партиските анкети пред изборот на раководство на ЛДП на 22 септември, укажува на потребата за намалување на владините трошоци, приходи и други даноци, за да зајакне економијата која се тетерави на работ на рецесија.
„На јапонската економија и' се потребни три години за да се излечи. Таа ќе се обнови на краткорочен, сконцентриран начин“, истакна Асо (67) во неговата политичка платформа. „Она што е сега потребно се реформи за иднината. Јас тие решително ќе ги продолжам“. Другите кандидати, меѓу кои министерот за економија Каору Јосано, сакаат да ја задржат целта за балансирање на јапонскиот буџет до 2012 година. (Ројтерс)
|
