Првомајска синдикално-владина идила

Македонија нема проблеми со работничките права. Таков впечаток се доби од годинешната прослава на Меѓународниот ден на трудот. Работниците низ светот го одбележаа Први мај со маршеви и протести. Во Франција, Германија, Шпанија, Португалија, Турција, Русија, Грција... незадоволството го искажаа со излегување на улица. Нивните македонски колеги одлучија да си останат дома или, пак, да ги запоседнат излетничките места. И додека револтот на работниците од некои земји ескалираше дури и со судири со полицијата, фрлање молотови коктели - жешко и зачадено беше и кај нас, но од распалените скари!

Дека нашава земја е уникум во она што претставува „светска практика“ во борбата за поголеми права, доволно индикативно зборува и начинот на кој синдикалното водство реши да го одбележи овој ден. Како во Македонија да е се' идеално и да нема проблеми, нив ги немаше на чело на протестите, но затоа, пак, решија на плоштадот „Македонија“ да ја промовираат кампањата за мобилизирање ново членство.

Сосема невообичаено и неприкладно, но токму на денот кога требаше да се искаже став околу редуцираните работнички права, ниските плати и големата експлоатација што постои во одделни гранки, првите синдикалци отидоа на славје кај власта. Владин тим предводен од вицепремиерот за економски прашања, Владимир Пешевски, одржа работна средба со претставници на Сојузот на синдикатите на Македонија и на Конфедерацијата на слободни синдикати. Средбата е одржана по барање на двата синдиката (ССМ и КСС) и е оценета како „историска“. Објаснувањето е дека првпат на заедничка маса седнале претставници на сите синдикати.

„Работнички протести и штрајкови ќе има во оној момент кога навистина ќе се постигне консензус за тоа. Не сакаме да се доведеме во позиција да излегуваме со 200 до 300 луѓе, а од друга страна, да гледаат или некои други граѓани или некои други работници дека нешто правиме, а во основа ништо не правиме. Работнички протести и штрајкови ќе има кога ќе дојде време“, изјави новиот претседател на ССМ, Живко Митревски.

Владините министри, пак, не го криеја задоволството од „обновениот дијалог со Синдикатот“ и не пропуштија да излезат во јавноста со пригодни изјави. „Први мај станува историски ден, не само поради историјата на работниците низ целиот свет туку и за синдикалните организации во Македонија, кои денес, по долги години, првпат се случува на иста маса да седнат сите синдикати со Владата во еден искрен и отворен дијалог, социјален дијалог, кој е битен и за синдикатите и за работниците воопшто“, изјави вицепремиерот за економски прашања, Владимир Пешевски. Тој изрази надеж дека до крајот мај синдикатите ќе се организираат поквалитетно и оти ќе се воспостави и ќе профункционира Економско-социјалниот совет, како рамка преку која на редовна основа ќе се одвива тој дијалог.

Се огласи и премиерот Никола Груевски, кој по повод Празникот на трудот, им порача на македонските работници дека Владата работи на создавање подобри услови и права за работници и подобрување на економските услови во земјава. Тој истакна дека Владата ќе продолжи да работи во насока на подобрување на животниот стандард, условите, заштитата и правата на работниците, како и добриот дијалог со нив.

Единствени што излегоа на протест беа Движењето за социјална правда – Ленка, а првомајски марш одржаа и Титовите леви сили и Нова социјалдемократска партија. Приврзаниците на Слобдан Угриновски го направија тоа на свој начин - со лопати и слики на Тито и со пароли дека во времето на Броз подобро се живеело. (Г. Д)