Големи апетити за директор на Пулмологија
Многу луѓе влегоа во трка да станат директор на Клиниката за пулмологија откако в.д. директорката Деска Димитриевска доби решение за разрешување поради вмешаност во скандалот со спонзорски средства наменети за конгрес, кои незаконски биле поделени меѓу лекарите меѓу кои таа.
За утре министерот за здравство Бујар Османи најави дека треба да ги именува директорите на десетина клиники. Како што се ближи тајмингот за именување, така се разгоруваат притисоците во партиите на власт кој да се намести на директорската фотелја на Пулмологија.
Во јавноста се вртат повеќе имиња, а на конкурсот за директор на оваа клиника, како што дознаваме неофицијално, се пријавиле д-р Генцијана Стевчевска и д-р Бисерка Ќаева. ВМРО-ДПМНЕ не отстапува да го задржи ова директорско место откако не успеа од разрешување да ја спаси д-р Димитриевска. Како што велат извори во ВМРО-ДПМНЕ, се притиска за директор да се постави д-р Марија Здравеска, претседател на Управниот одбор на Клиниката за пулмологија.
Со амин на претседателот на УО, како што велат неофицијални извори, била одобрена и одлуката за поделба на спонзорските средства. Правни експерти велат дека не може некој што е вмешан во незаконски дејства да биде директор на јавна установа. Дотолку повеќе, велат професори од Правниот факултет, што не може за едно исто кривично дело да има два аршина - виновна да е директорката, а не и претседателот на Управниот одбор кој ја визирал одлуката.
За другите клиники, најверојатно, веќе е дефинирано како ќе се поделат директорските места, иако никој не исклучува дека во последен момент се можни и изненадувања. (J.J.) |
