Привремено вработените да се рамноправни со редовните

Луѓето кои работат преку агенциите за привремени вработувања да бидат подобро заштитени и да добијат рамноправен третман со редовно вработените. Ова е целта што би требало да се постигне со измените на Законот за агенциите за времени вработувања, за кои Собранието ја утврди потребата да се изгласаат.

Со предложените измени се врши усогласување на домашното трудово законодавство со легислативата на ЕУ, образложи заменик-министерот за труд и социјална политика, Спиро Ристовски.

„Вака се формира заштитно правна рамка за привремените работници, која е недискриминациска, транспарентна и пропорционална. Со измените се вградува принципот на еднаков третман и исто ниво на здравје и безбедност при работа, без разлика дали лицата се редовно вработени или преку агенции, а се вршат и измени кај казнената политика“ рече Ристовски.

Опозицијата излезе со обвинувања дека овој Закон досега се користел за партиски вработувања и тоа дека Владата најмногу ги злоупотребувала овие вработувања за партиски потреби. „Се сомневам дека ќе престане злоупотребата. Во Македонија најголема злоупотреба на тие вработувања има од Владата и не гледам политичка волја да прекине тоа“, рече Радмила Шеќеринска од СДСМ. (Ек.Р.)