12.02.2012, 11:36 Грчкиот Парламент треба да се изјасни по новиот договор со ЕУ и ММФ
Новиот договор предвидува намалување на платите и пензиите, како и на бројот на вработени во државната администрација
Грчките пратеници денеска треба да се изјаснат по Предлог-законот за новиот договор што Владата на Грција го постигна на претставниците на „тројката“ составена од ЕУ, Европската централна банка и Меѓународниот монетартен фонд (ММФ).
Новиот договор предвидува намалување на платите и пензиите, како и на бројот на вработени во државната администрација, во замена за исплата на нов кредит во износ од 130 милијарди евра, што би требало да ја спаси земјата од банкрот.
Наспроти незадоволството во јавноста и масовните протести, се очекува Парламентот да го усвои Предлог-законот со големо мнозинство. Покрај пратениците од опозицијата, против законот се очекува да гласаат и дел од народните избраници од редовите не трите партии што партиципираат во актуелната Влада на Грција на Лукас Пападимос.
Во знак на несогласување со новиот договор, во четвртокот и петокот оставки поднесоа шестмина членови на Владата.
Лидерте на двете најголеми партии во Грција, ПАСОК и Нова демократија, Јоргос Папандреу и Андонис Самарас вчера ги повикаа пратениците да го поддржат договорот, оценувајќи дека тој нема реални алтернативи и дека неговото неусвојување ќе ја втурне земјата во банкрот.
За попладеново за кога е предвидена расправата по Предлог-законот, најавен е протест пред Парламентот во Атина во организација на водечките синдикати, кои се противат на договорот со ЕУ и ММФ.
|
