Пресуда - За „Пајажина“ – 109 години затвор

На осудените им се изречени и парични казни. Тринаесет години затвор за сопственикот на телевизија А1, Велија Рамковски. Вчера напладне беа изречени првостепените казни за сите 18 обвинети - вкупно 109 години затвор

Љубиша Станковиќ



Тринаесет години затвор за сопственикот на телевизија А1, Велија Рамковски. Вака одлучи Кривичниот совет на Основниот суд Скопје 1, со кој претседаваше судијката Павлина Христова. По една година од почетокот на судскиот процес наречен „Пајажина“, вчера напладне беа изречени првостепените казни за обвинетите. Судот изрече казни од вкупно 109 години затвор за 18-мина од обвинетите, условна казна му е одредена на Александар Дамовски, додека тројца се ослободени бидејќи не се докажало делото.

Седумгодишна казна доби синот на Велија, Хеди Рамковски, а на по шест години се осудени неговата ќерка Емел и братот Амди. Директорот на А1, Дарко Перушевски, е осуден на 5,5 години затвор, а Анета Кочишки на 2,3 години. До правосилноста на пресудата, таа ќе биде пуштена на слобода.

Рамковски и неговата ќерка смирено ја дочекаа пресудата.

За него судот најде дека се занимавал со перење пари и за тоа дело му изрече казна затвор од шест, за даночно затајување нови пет, за злосторничко здружување три и за злоупотреба на служената положба уште една година или се' вкупно 15 години.

„Очекувано беше. Пресудата е резултат на конструкција и селекција на докази. Се надевам дека повисоките инстанци ќе го имаат тоа предвид“, рече скопскиот адвокат Стеван Павлески, непосредно по сослушањето на одлуката на судот за притворот кој на обвинетите им беше изречен пред повеќе од една година. Всушност, од решението на Советот единствената која може да биде задоволна е Анета Кочишки, бидејќи нејзе и' беше укината мерката куќен притвор, а Велија и Емел Рамковски, како и Дарко Перушевски остануваат во притвор се' до правосилност на пресудата.

„Ја очекуваме писмената пресуда за која сметам дека судијата ќе има сериозни проблеми да ја образложи“, рече адвокатот Никола Поленак.

Освен затворските казни, судот безмалку на сите обвинети им изрече и парични казни во висина од две до пет илјади евра, односно беа изречени парични казни во висина од 61.000 евра, а некои од осудените беа задолжени, солидарно, да им ја надоместат штетата на оние компании кои се јавуваат како доверители. Меѓу оние кои треба да бидат намирени се и печатниците „Европа 92“ со 12 милиони и „Цетис принт“ со пет милиони денари.

Во обврските, кои произлегоа од пресудата, се и оние кои се однесуваат на намирување на милионски штети по разни основи. Така, само на име затаен данок судот пресмета дека треба да се надоместат 286.731.670 денари, како и 18.904.247 денари кои исчезнале со празнење на сметките на фирмите на Рамковски и уште 8.469.523 милиони на име данок.

Во елаборацијата на пресудата судијката Христова кажа дека Судечкиот совет постапувал по обемно и сложено обвинение, но дека од текот на постапката се утврдило дека обвинетите ги сториле кривичните дела за кои беа обвинети. Таа кажа дека во изминатава година судот одржал 66 судски рочишта на кои биле распрашани 25 сведоци, неколку вешти лица и извел многу писмени докази.

Токму од изведените докази судот ја утврдил фактичката состојба и утврдил дека Велија Рамковски и уште неколкумина негови блиски роднини и соработници формирале злосторничко здружение чија цел било испумпување на големи парични износи. На групата подоцна и' се приклучиле и други лица, но суштината била иста.

Парите од компаниите регистрирани на „Перо Наков“ завршувале во фирмите кои биле под контрола на Велија Рамковски, а биле регистрирани во Турција, Хрватска и во САД. За судот не постоеле дилеми околу начинот на кој се работело, односно дека со честите ротации на раководните лица и фиктивните позајмици и наплати само се избегнувале обврските кон државата и кон други доверители.

Самото изрекување на пресудата за обвинетите во случајот наречен „Пајажина“ беше во крајно нервозна и напната атмосфера. Во предворјето на Кривичниот суд вчера можеа да се видат десетици роднини и пријатели на обвинетите и уште толку полициски работници.

Доцнењето со објавата на првостепената пресуда, веројатно, дојде и поради погрешната процена на судот, кој одлучи тоа да го направи во судницата број 1, место во некоја поголема во соседните објекти. Турканиците почнаа уште на самиот влез, а ништо подобро не беше и во судницата.

„Кој ��е снима?“, запраша Велија Рамковски откако во судницата влегоа фоторепортерите и снимателите. Судот го замоли да молчи, но тој продолжи: „Ако веќе ми го гледаат ликот, зошто тогаш да не ми ја чујат и мислата?“, рече Рамковски.

Роднините ја чекаа пресудата пред судот

Роднини на осудените, нивни пријатели и поранешни колеги кои работеа во телевизија А1, вчера мирно пред судската зграда пред Кривичниот суд во Скопје ја чекаа пресудата за Велија Рамковски и преостанатите приведени во случајот „Пајажина“. Меѓу присутните беа и актуелните пратеници во Собранието, Ленче Николовска и Сафет Бишевац, како и лидерот на Партијата за европска иднина и сват на Рамковски, Фијат Цаноски. Поради просторна ограниченост во судот, беше дозволено само по еден член од фамилиите да може да присуствува на пресудата во Основниот суд Скопје 1.

Уште долго време по донесената одлука со која беа изречени затворски казни за повеќето од групата, насобраните пред судот не си заминуваа.

По шест години затвор за ќерката и за братот на Рамковски

На највисока и единствена казна затвор во траење од 13 години судот го осуди сопственикот на телевизија А1, Велија Рамковски. На по шест години затвор судот ги осуди братот на Велија, Амди Рамковски, Жаклина Ѓоргиевска, Невин Рауф, Зоран Мицевски, Емел Рамковска, Славица Маринковска, Бранко Пишев и Рамадан Чичек.

Една година затвор повеќе судот им изрече на Хеди Рамковски, Неше Рамиз Ибрахими и Рамадан Ибрахими, а поранешниот директор на А1, Дарко Перушевски само шест месеци помалку.

Поранешниот управител на фирмата „Хедис“, Жарко Стојановски, судот го осуди на 3,5 години, додека обвинетата Ибраим Ибраими доби три години затвор. Управителката на „Плус продукција“, Ѓултен Џемаили, судот ја осуди на пет години, Наташа Крстановска и Слободан Пејовски на по четири, а директорката на ТВ А1 Анета Кочишки на 2,3 години затвор.

Иако судот најде вина и кај обвинетиот Александар Дамовски и го осуди на две години затвор, сепак, казната му беше заменета за условен затвор во траење од четири години. За одржувачот на компјутерскиот систем на фирмите во „Перо Наков“, обвинетиот Јасмин Љатифовиќ, и чуварите Маријан Танчевски и Муамед Абди судот не најде докази дека го сториле делото за кое тие тројца се товареа со обвинителен предлог.