12.03.2013, 12:40 Спарси го добија дербито на Западот
Сан Антонио на домашен терен го порази тимот на Оклахома со 105:93 без помошта на повредениот Тони Паркер
Три дена по најубедливиот пораз сезонава на домашен терен од Портланд, Сан Антонио во новиот настап пред своите навивачи покажа многу поквалитетна претстава. Спарси го добија дербито на Западната конференција совладувајќи ја Оклахома со 105:93. Триумфот на „мамузите“ доби уште поголема тежина бидејќи до него дојдоа без помошта на Тони Паркер, кој поради повреда на зглобот ќе мора да паузира уште три недели.
„Мислам дека сите одигравме добро, и јас бев дел од тие кошаркари. Кога ќе одиграш добро, веднаш се чувствуваш одлично. Нашата цел отсекогаш била да одиграме максимално токму против ваков противник. Сепак на крајот мора да останеме скромни. Ова беше само уште еден натпревар“, изјави Тијаго Сплитер, кој со 21 поен и десет скока беше најефикасен кај Сан Антонио. Кавај Леонард постигна 17 поени, додека Дени Грин застана на 16 поени. Кај Тандерси Кевин Дурант со 26 поени, шест скока и пет асистенции беше прв стрелец на средбата, Расел Вестбрук реализираше 25 поени.
„Кога противникот физички не исцрпува во одбраната, не успеваме да го одиграме своето во нападот. Спарси во овој дел одлично ја завршија работата. По правило знаеме да се наметнеме, да дојдеме до подобри шутеви и подобра игра во нападот. За среќа сето ова може да се поправи, по секој натпревар задолжително ја гледаме снимката и на тренинзите го исправме она што не е добро“, коментира тренерот на Оклахома Скот Брукс.
Во помалото дерби Филаделфија на свој терен го совлада Бруклин со 106:97. За тренерот Фил Колинс ова беше 100. јубилејна победа на клупата на овој тим, а додека на другата страна Дерон Вилијамс дојде до 10.000 поени во својата кариера. Плејмејкерот на Нетси постигна 27 поени и 13 асистенции во поразот на својот тим.
Тимот на Њујорк забележа убедлив пораз на гостувањето кај Голден Стејт (92:63). Вориорси ја одиграа најдобрата одбрана, уште од 1953 година кога во тоа време ги запреа Милвоки Хоукс на 63 поени. Стивен Кари со 26 поени и Дејвид Ли со 21 поени беа први имиња кај победникот. Кај Никси Кармело Ентони се врати на паркетот по повредата, но постигна само 14 поени и десет скока.
Од таборот на Њујорк пристигна вест дека Амаре Стадемаер е успешно опериран и неговото враќање може да се очекува најмалку за шест недели.
Резултати: Филаделфија - Бруклин 106:97, Сан Антонио - Оклахома 105:93, Јута - Детроит 103:90, Феникс - Денвер 93:108, Голден Стејт - Њујорк 92:63.
|
