Ако се отцепи, Фландрија ќе заличи на Косово

Брисел – „Ако одлучи да се отцепи од Белгија, Фландрија ќе заличи на Косово“, изјави поранешниот белгиски премиер од почетокот на осумдесеттите години на минатиот век, Марк Ејскенс, кој е Фламанец и познат економист.

Во вчерашното интервју, кога се очекува кралот на Белгија, Албер Втори, да го определи датумот на вонредните парламентарни избори во државата, Ејскенс предупредува дека добро претставување на изборите на фламанските сепаратистички партии, Нова фламанска алијанса и Влаамс Беланг (Фламански интерес), може да предизвика тешки последици за иднината на државата, особено за економијата.

„Победа на тие партии на изборите може да ги поскапи заемите земени од Белгија, а тоа би било катастрофа за нејзината економија и за државниот буџет“, смета тој. 

Истовремено, Ејскенс е со став дека ако под притисок на такви партии Фландрија реши еден ден да се отцепи од Белгија и да формира самостојна држава, областа ќе личи на Косово, и другите држави во светот ќе се воздржат од признавање на нејзината независност. 

Во разговорите за независна Фландрија се потценува проблемот дека при отцепување, Валонија и Брисел ќе продолжат да ја претставуваат Белгија, макар и во помал размер на меѓународен план. „Фламанците треба да дадат сметка дека во таков случај Брисел ќе стане целосно франкофонски град, а границата на Фландрија ќе се помести на север од сегашната лингвистичка граница меѓу Фландрија и Валонија“, додава тој. (МИА)