Македонија соочена со наплив на турски инвестиции

„Македонија има сериозен бран инвестиции од Турција што почнуваат да се реализираат или се најавени да почнат“, изјави премиерот Никола Груевски по поставувањето камен-темелник за изградба на објект на приватната специјална очна болница „Европа“. Освен оваа очна болница, според Груевски, во земјава има наплив и на други турски инвестиции. Една од нив е најавата на компанијата „Џевер“ за инвестиција не помала од 150 милиони евра за изградба на четири 40-катници во општината Аеродром, со трговски центри во наредните од четири до шест години.

„Компанија ТАВ влезе со инвестиција од над 150 милиони евра за реконструкција на двата аеродрома и изградба на нов карго-аеродром. Турски инвеститор ја купи и фабриката за производство на лепила ’Белене‘ во Берово што беше во рамките на ОХИС. Треба да почне градба на компанија за експлоатација на мермер во околината на Прилеп, а во најава се изградба на цементарница, фабрика за производство на храна и прехранбени продукти, како и најавената инвестиција на ’Шише џам‘, што се надеваме дека кон крајот на оваа година или почетокот на следната ќе почне да се реализира“, рече Груевски.

Тој посочи дека компанијата „Шише џам“ врши подготовки, мерења и истражувања поврзани со разни репроматеријали и минерали, места каде што ќе може да се стационира фабриката. „Проблематично е да биде во Бунарџик, додаде тој, бидејќи висината на оџаците не може да биде толкава поради близината на аеродромот“. (МИА)